“3 kushtet që kthehemi në izolim”, mjeku Erion Dasho pyet Komitetin Teknik: A do kemi një karantinë të dytë?

Eksperti i Shëndetit Publik, Erion Dasho, në një reagim në mediat sociale ka hedhur sot idenë për një karantinë të dytë. Në një postim në mediat sociale, Dasho duke iu referuar rikthimit të kufizimeve pyet Komitetin e Ekspertëve nëse do izolohen sërish qytetarët. Mjeku ka analizuar numrin e testeve, rastet ditore dhe vdekjet, duke thënë se kufizimet mund të rikthehen në kushtet kur numri mesatar i rasteve është rritur mbi 6 herë, ai i vdekjeve mbi 8 herë dhe përqindja e personave që testojnë pozitivë ka arritur 25%.

POSTIM I PLOTË

A DO TË KEMI SËRISH KARANTINË?! Kufizimet rikthehen pas më pak se dy muajsh nga heqja e tyre në fund të muajit maj. Kufizimet u hoqën në kushtet kur numri mesatar i rasteve ishte 13 në ditë, ai i vdekjeve 0.4 në ditë dhe përqindja e personave që testonin pozitivë ishte më pak se 8%. Rikthehen në kushtet kur numri mesatar i rasteve është rritur mbi 6 herë, ai i vdekjeve mbi 8 herë dhe përqindja e personave që testojnë pozitivë ka arritur 25%, pra një në katër persona të testuar rezulton pozitiv për SARS-CoV-2. Fillimisht u mbyllën pishinat, tashmë baret dhe muzika dhe nuk do të jetë çudi sikur dita e re të sjellë një kufizim të ri.

Grafiku 1

SI U ARRIT NË KËTË PIKË? Tashmë çdokush e ka kuptuar se mungon strategjia për menaxhimin e situatës dhe autoritetet shëndetësore e kanë humbur kontrollin mbi epideminë. Trinomi Testo-Gjurmo-Trajto nuk funksionon duke filluar nga elementi i parë – testimi. Shqipëria vazhdon të jetë vendi i fundit në Europë nga numri i testimeve, duke patur ditë të caktuara kur numri i tyre ka qënë më i ulët se ditët e majit (267 teste tamponi të kryera në 19 korrik). Komponenti parandalues ka dështuar në spitale, administratë dhe biznese dhe pasi epidemia u “maturua” në këto vatra (sipas OBSH-së), ka arritur në transmetim komunitar (sipas Komitetit të Ekspertëve). Autoritetet shëndetësore kanë përballë një publik i cili ka humbur besimin dhe e ndjen veten të tradhëtuar. Publiku e kuptoi se sakrifikoi dy muaj e gjysmë karantinë për të fituar më pak se dy muaj liri. Biznesi është në kaos, sidomos ajo pjesë e biznesit të lulëzon gjatë verës dhe siguron gati një të pestën e GDP-së – turizmi. Sot turizmi nuk është luks. Ai është relaks për shëndetin mendor dhe mundësi për të përmirësuar shëndetin fizik dhe social aq të dëmtuar gjatë karantinës.

Për më shumë bëhu pjesë e grupit më viral në Facebook, Dosja.al

Grafiku 2

MË SHUMË SE KATËR MUAJ KANË KALUAR NGA DIAGNOSTIKIMI I RASTIT TË PARË ME COVID NË SHQIPËRI DHE VENDI E GJEN VETEN TË IZOLUAR NGA KOMUNITETI NDËRKOMBËTAR DHE NË PRAG TË ASHPËRSIMIT TË MASAVE KUFIZUESE BRENDA VENDIT. NGA TRE TREGUESIT E PËRCAKTUAR NGA MINISTRIA E SHËNDETËSISË DHE KOMITETI I EKSPERTËVE, NJËRI KA NJË MUAJ QË ËSHTË PLOTËSUAR – MESATARJA DITORE E NUMRIT TË RASTEVE TASHMË E KALON 25 DUKE ARRITUR GJATË KORRIKUT NË MESATARISHT 84. SHUMË SHPEJT MUND TË PLOTËSOHEN EDHE DY KRITERET E TJERË – NUMRI I PERSONAVE TË SHTRUAR MUND TË KALOJË 150 DHE AI I PERSONAVE TË SHTRUAR NË REANIMACION MUND TË KALOJË 25.

Grafiku 3

SIPAS KOMITETIT TË EKSPERTËVE MJAFTONTE TË PLOTËSOHEJ NJË NGA KËTO KUSHTE PËR T’JU RIKTHYER KUFIZIMEVE. ME KËTO TENDENCA QË SHOHIM SOT, PËR PAK DITË MUND TË PLOTËSOHEN JO NJË POR TË TRE KUSHTET E ALARMIT. SOT SHQIPTARËT E KANË KUPTUAR SE “VIZIONI” I AUTORITETEVE SHËNDETËSORE PËR TË KONTROLLUAR COVID-IN ARRIN DERI TEK KARANTINA. KOMITETI I EKSPERTËVE ËSHTË TREGUAR THELLËSISHT I PAAFTË TË NDËRMARRË MASA INTELIGJENTE DHE STRATEGJIKE! PYETJA E NATYRSHME QË KANË GJITHË SHQIPTARËT PËR AUTORITETET SHËNDETËSORE DHE KOMITETIN E EKSPERTËVE ËSHTË: A DO TË HYJMË SËRISH NË KARANTINË?!

Reagimi i ekspertit të Shëndetit Publik, Erion Dasho, vjen në një kohë kur në Shqipëri në 24 orët e fundit janë shtuar 4 viktima dhe 119 raste të reja. Një ditë më parë janë kryer 482 testime për të dyshuar.