APD: Tragetet e linjave në nëntë muaj transportojnë 563 mijë ton mallra

Pavarësisht se tragetet kanë kryer më pak lundrime (krahasuar me 2019) dhe kufizimet për shkak të pandemisë kanë shkaktuar rënie të numrit të pasagjerëve, konstatohet qendrushmëri në transportin e mallrave, në Portin e Durrësit dhe më të madhin në vend. Tragetet e linjave Durrës – Bari dhe Durrës – Ankona e kthim, gjatë periudhës janar-shtator të këtij viti, kanë transportuar 563 mijë t mallra të ndryshme.

Kjo shifër është më e vogël se sa ajo e së njejtës periudhë të vitit të kaluar, për shkak të kufizimeve të lundrimeve prej pandemisë së Covid-19.

Nga të dhënat e sektorit të Statistikave, mësohet se gjatë këtyre 9 muajve tragetet kanë kryer 553 lundrime, ose 252 të tilla më pak se në janar-shtatorin e vitit 2019.

47,792 kamionë dhe trajlerë janë transportuar nga tragetet e linjave nga Durrësi gjatë këtij 9-mujori, ndërsa numri i autoveturave personale ka arritur në 50,592.