Takimi me gratë sipërmarrëse/ Bardhi: Ndryshimi me 25 prill për tregun e lirë, taksa të ulëta dhe qeveri miqësore

Drejtuesi Politik i PD për Elbasanin u takua me disa gra sipërmarrëse, që nga biznesi i vogël e deri tek ai fason dhe i eksporteve, ku dëgjoi shqetësimet e tyre për vështirësitë dhe barrën e madhe fiskale që kanë.

“E di që është e vështirë të bësh biznes në Shqipëri, aq më tepër nga një grua. Situata ka shkuar aty ku nuk mban më. Ka biznese që jo vetëm nuk fitojnë më, por dalin me humbje dhe e mbajnë aktivitetin për hir të investimeve të shumta që kanë bërë. Ne do të krijojmë një lehtësim të madh fiskal. Për biznesin e vogël do të jetë vetëm 0.5 përqind e xhiros, dhe pulla në xham që tregon shlyerjen, do të mbajë larg tatimorët. Do të kemi për gjithë biznesin lehtësim dhe përkrahje, duke ulur barrën e sigurimeve, çmimin e energjisë. Do të ndalim për një vit sulmin e inspektorëve që lëshohen si hienat dhe përveç dëmit financiar, shkaktojnë edhe probleme psikologjike tek sipërmarrja”, u shpreh Bardhi.

Bruna drejton një fasoneri, dhe shprehet se rritja e taksave e ka vështirësuar shumë aktivitetin. Ajo shton se rritja e pagës minimale e pashoqëruar nga qeveria me mbështetje ose lehtësime, i ka shtuar me 50 përqind kostot e saj.

Gledis ka një rrobaqepësi, të cilën tashmë e mban vetë, pasi nga rënia e punës dhe shtimi i kostove është detyruar të largojë nga puna gratë që kishte marrë aty. Ndërhyrjet e bashkisë në rrugë e kanë vështirësuar edhe më shumë. Ajo thotë se e hap dyqanin disa orë vetëm se i dhimbset investimi që ka bërë.

“Humbja e vendeve të punës është një kosto për të gjithë, sepse ata që hidhen në rrugë, do të duhet të futen në skemat e ndihmës sociale”, u shreh Bardhi.

Pranvera ka një dyqan të vogël fruta perimesh dhe shprehet se aty del vetëm sa për të mbajtur një person. Ankohet për taksat vendore dhe presionin e policisë bashkiake, dhe nëse nxjerr një kuti jashtë shkojnë e i kërkojnë lekë.

“Kanë rritur taksat dhe tarifat, kanë fryrë buxhetet po çfarë i kanë bërë paratë? Në rast se do i kthenin mbrapsht në shërbime, gjysma e së keqes, por i kanë bërë paga për punonjës që rrinë kot, por u duhen tani vende pune para zgjedhjeve”, u shpreh Bardhi.

Kjo është tronditëse sipas Brunës, e cila ka një kompani të madhe eksporti, por thotë se i nënshtrohet një terrori kontrollesh, deri në 17 herë në vit. Ajo thotë se administrata është fryrë vetëm me njerëz që pinë kafe, me mijëra filxhane kafeje kudo në zyra.

Klodiana që ka një moblieri ankohet për pabarazinë dhe konkurencën e pandershme. Ajo shprehet se nuk ka garanci, dhe çdokush mund të futet në këtë sektor, të pastrojë paratë e pisëta, ndërkohë që ata që punojnë me ndershmëri e vuajnë në kurriz.

Gazment Bardhi u shpreh se duhet rezistencë edhe ditët që kanë mbetur, pasi me 25 Prill ndryshimi do të vijë, dhe biznesi e sipërmarrja do të kenë qeverinë në krah që do i mbështesë. Biznesi rrit ekonominë dhe ndihmon në zhdukjen e varfërisë në Elbasan e kudo.