Blendi Fevziu, mesazh drejtuesve të mjeteve: “Mos konsumoni alkool kur udhëtoni me mjet!”

Askush nuk mund të konsumojë alkool dhe më pas të ngasë makinën në mënyrë të sigurt, edhe nëse është një drejtues mjeti me përvojë. Statistikat shprehen se 1 në 3 aksidente me pasoja fatale vjen si rezultat i përdorimit të alkoolit nga drejtuesi i mjetit.

Drejtoria e Përgjithshme e Shërbimeve të Transportit Rrugor (DPSHTRR), ka nisur fushatën e sigurisë rrugore ku janë ftuar personalitete të njohura nga fusha të ndryshme për të ndarë mesazhe ndërgjegjësuese për sigurinë dhe edukatën rrugore, udhëtimin me kujdes dhe për respektimin e rregullave të qarkullimit rrugor.

Si një nga figurat më të mirënjohura televizive, kësaj fushate i është bashkuar gazetari dhe Drejtuesi i emisionit “Opinion”, Blendi Fevziu, si Ambasador i Sigurisë Rrugore, duke ndarë me publikun në një video 1 minutëshe këshilla të vlefshme për mospërdorimin e alkoolit gjatë udhëtimit me mjet.

Z. Fevziu i bën thirrje drejtuesve të mjeteve që të udhëtojnë gjithmonë me kujdes duke mos rrezikuar jetën e tyre, të pasagjerëve, të familjarëve dhe qytetarëve të pafajshëm që mund të gjenden në vendin e gabuar në momentin e gabuar.

Nëse duhet të udhëtoni pasi keni pirë alkool, tregohuni të përgjegjshëm: mos e ngisni makinën. Merrni një taksi ose kërkojini një miku të ngasë makinën në vendin tuaj. Mendoni edhe për njerëzit që ju rrethojnë: mos i lejoni miqtë tuaj të ngasin makinën nëse kanë pirë alkool.