Lideri i Lëvizjes Vetëvendsoje, Albin Kurti ka reaguar pas vendimit të Gjykatës Supreme, sipas së cilës këtij të fundit nuk i lejohet kandidimi në zgjedhjet e 14 shkurtit.
Kurti gjatë një vizite në Prizren, tha se ende nuk e ka parë vendimin e Supremes, pasi ta shohë thotë se do ta analizojnë që të ndërmarrin hapa të mëtejshëm.
“Secili prej duhet ta mbështet listën e VV-së. Neve na duhen 61 deputetë. Të votohet masivisht ashtu sic ka aplikuar mërgata jonë. Më 14 shkurt le ta bëjmë festë të VV-së. Unë nuk e kam parë atë vendim, kur të vjen në zyrën e LVV-së, e trajtojmë dhe e analizojmë se çfarë hapa do të ndërmarrim më tutje, që të ankohemi nëse është kështu”, ka thënë Kurti.
Në vendimin e Supremes thuhet se kandidatët për deputetë, Liburn Aliu dhe Labinotë Demi Murtezi, duhet të përfshihen në listën e kandidatëve për deputetë. Ndërkaq, është refuzuar pjesërisht e pabazuar ankesa e LVV-së, duke vërtetuar vendimin e PZAP-së, duke lënë kështu jashtë liste liderin e VV-së, Albin Kurtin.
