Aktualitet
Përsëritet rasti “Mihali”, pronarët i zënë rrugën pushuesve, fëmija qan në makinë
Një tjetër incident mes pushuesve dhe pornarëve të një hoteli ka ndodhur edhe këtë vit në Jug të vendit. Një çift pushuesish së bashku me vajzën e tyre të vogël kanë shkuar për të kaluar disa ditë në bregdetin e Livadhës, por janë përballur me të papritura.
Balkan web raporton se çifti e kishte prenotuar për tri ditë hotelin, të premten, të shtunën, të dielën, por pak ditë më parë kanë kërkuar që të shkonin që të enjten dhe nga ana e hotelit kanë marrë përgjigje pozitive.
Për dy ditë që kanë qëndruar, çifti ka mbetur i pakënaqur nga kudhtet dhe ka tentuar të largohet të shtunën duke kryer edhe pagesën për ditët që qëndruan. Mirëpo pronarja nuk i ka lejuar dhe i ka kërkuar pagesën deri në ditën e diel.
Videoja e publikuar nga Balkan web tregon gruan mjaft të nervozuar kur sheh se pushuesit po e filmojnë. Ajo fillon t’i akuzojë ata se i kanë bërë dëm duke i djegur çarçafët dhe i ka kërkuar paratë, ndërsa ka dalë në rrugën kryesore në Himarë duke i penguar të largohen.
Pushuesit kanë kërkuar të denoncojnë në polici e cila vonoi të vinte për disa minuta, ndërsa konflikti vijonte. Por gruaja nuk ndalet këtu, pasi thërret për ndihmë edhe një person tjetër, ndërsa çifti ndalohet dy herë nga pronarja e hotelit për të shkuar në polici. Si përfundim pushuesit kanë denoncuar në policinë e Sarandës, ndërsa në video dëgjohet e qara e vajzës së mitur, e frikësuar për atë që po ndodh.
Kujtojmë se një rast i ngjashëm është përsëritur disa vite më parë. Mihal Kokdhima në Himarë ndaloi disa pushues të huaj pasi atyre nuk u kishte pëlqyer ushqimi dhe nuk kishin pranuar të paguanin.