“Votuam dhe po iknim tek Opera”, ish-ministri kosovar rrëfen tmerrin në sheshin “Skënderbej”: Ishim shumë afër makinës

Ish-ministri i Tregtisë në Qeverinë e Kosovës, Bajram Hasani është bërë sot dëshmitar i ngjarjes së rëndë që ndodhi në Sheshin Skënderbej në kryeqytet, duke i shpëtuar mrekullisht goditjes së makinës.

Hasani nga kryeqyteti shqiptar ka thënë për Gazetën Express se ishte shumë afër makinës, e cila u ndalua nga qytetarët për të mos shkaktuar ndonjë tragjedi.

Hasani tha se pasi bashkë me gruan e tij kishin votuar në zgjedhjet parlamentare që po mbahen atje, kishin vendosur të pinin kafe afër teatrit të Operas dhe Baletit, ku kishin qenë shumë afër në momentin që vetura rrezikoi jetën e të pranishmëve.

“Po, isha aty. Për besë nuk di. Ne ishim me bashkëshorten. Ishim me votu dhe u kthyem, hajt të afrohemi këtu te Opera ta pimë nga një kafe, edhe veç hyri vetura qysh e patë.

Ne ishim shumë afër. Ndoshta ishim më së afërmi prej të gjithë të tjerëve. Ka mundur të na godasë vetura”, tha Hasani Ai tha se shqetësimi ishte i madh.

“Për fat të mirë intevenuan qytetarët dhe një djalë hyri për xhami dhe e ndaloi. Veç na shqetësoi shumë. Në mes të sheshit, ishte e papritur”, tha ai.

Për ngjarjen e pazakontë që ndodhi mesditën e sotme në sheshin Skëndërbej, ku një 32 vjeçar ka rrezikuar jetën e qindrave qytetarëve në shesh, Policia e Shqipërisë ka dhënë detaje.

Policia ka thënë se Arben Mema fillimisht ka përplasur tri automjete në vende të ndryshme duke shkaktuar dëme materiale dhe më pas ka thyer barrierat mbrojtëse dhe ka hyrë në sheshin “Skënderbej” duke rrezikuar seriozisht qytetarët.

Ndër të tjera, Policia bën me dije se gjatë kontrollit fizik, atij iu gjet dhe iu sekuestrua një sasi me lëndë të dyshuar kanabis.