Zhdukja e Davide Pecorellit, Shqipëria kërkon nga Italia verifikimin e llogarive bankare të biznesmenit

Detaje të reja kanë dalë në dritë sa i takon hetimeve që po ndërmerren pas zhdukjes së mistershme dhe djegies së makinës me të cilën biznesmeni italian Davide Pecorelli lëvizte në Shqipëri.

Mësohet se pala shqiptare i ka dërguar një letërporosi homologëve italianë që të verifikojnë të gjitha transaksionet bankare që ai mund të ketë bërë në muajt e fundit me shtetas shqiptar.

Po ashtu mbetet ende në pritje analiza e ADN-së, nëse mbetjet kockore në makinën që u gjet e djegur në Pukë i përkisnin apo jo biznesmenit italian, që kishte ardhur në Shqipëri për të imvestuar në fushën e qendrave estetike, dhe aparaturave me lazer.

Prokuroria shqiptare ka kërkuar po ashtu nga Italia që të merren në pyetje partnerët që Pecorelli kishte në biznes.

Davide Pecorelli mbërriti në Shqipëri në fillim të muajit janar për të investuar në fushën e hoteleri turizmit, por humbi kontaktet me të afërmit pak ditë më pas.

Sipërmarrësi italian ndodhej prej datës 4 janar në Pukë. Ai kishte prenontuar në një hotel për tre ditë, por në datë 6 nuk u paraqit për të fjetur. Automjeti tip skoda, të cilin kishte marrë me qira në aeroportin e Rinasit u gjet i djegur në 8 janar në rrugën Gjegjan–Reps.

Hetuesit gjetën në mjetin e djegur eshtra si dhe sende të tjera, të cilat dyshohet se i përkasin biznesmenit. Mbetjet e trupit u dërguan për ekzaminim në laboratorin e kriminalistikës në Tiranë.